Powěsće: póndźelu, 10.05.2022


Hornja Łužica: Mejemjetanje kónc tydźenja

Kónc tydźenja su we wjacorych serbskich wsach meje mjetali, tak w Sernjanach, Koslowje a Radworju. W Sernjanach staj akordeonistaj jědnaće porow dźěći k rejam přewodźałoj. Holcy běchu w serbskej narodnej drasće. Sydom porow w Radworju bě tež serbske. Tam dožiwi wjacore sta ludźi pisany serbski wjesny swjedźeń, při kotrymž so meja při padnjenju samo złama. W Koslowje bě cyły areal při kulturnym domje srjedź wsy derje pjelnjeny, městna w stanje njedosahachu. Při powalenju meje je tam wjeršk w milinowodźe wisajo wostał, so pak ničo stało njeje.


Budyšin: Wubědźowanje młodych hudźbnych talentow

Wjace hač 100 dźěći je so kónc tydźenja na 12. wubědźowanju młodych talentow "Młoda serbska hudźba" w Choćebuzu a Budyšinje wobdźěliło. Prěni króć móžachu so tež rejowanske cyłki předstajić. Jury nazhonitych hudźbnikow a hudźbnych pedagogow je přinoški hódnoćała. Serbski ludowy ansambl tute wubědźowanje kóždej dwě lěće zarjaduje. Wosebje wuspěšni wobdźělnicy wustupja na zakónčacym koncerće 22. meje w Budyšinje.


Budyšin: Spominanje na wopory wójny

W Budyšinje su njedźelu tež zastupjerjo župy "Jan Arnošt Smoler" při pomnikach Při cyhelskim nasypje na padłych Druheje swětoweje wójny spominali. Na ćichim spominanju na sowjetskich wojakow je wyši měšćanosta Alexander Ahrens porěčał, wuprajo swoju nadźiju, zo so wójna mjez słowjanskimi bratrami w Ukrainje bórze skónči. Amtěrowaca županka Leńka Thomasowa je kwěćele ze serbskej seklu połožiła. Přitomni pak zwěsćichu, zo běše na pomniku za pólskich padłych pismo přemórane.


Lipsk: Serbsko-němski koncert chóra Lipa

Hromadźe z Markkleebergskimi wokalistami je chór Lipa njedźelu w Lipsku wustupił. Pod hesłom "Hudźba zwjazuje" zaklinčachu na žurli Stareje wikowanskeje bursy spěwy we wosom rěčach. Mjez připosłucharstwom bě tójšto Lipšćanskich Serbow. Z koncertom woswjećichu Markkleebergscy spěwarjo swój pjećlětny jubilej, chór Lipa zhladuje mjeztym na 115 lět skutkowanja. Kontakt mjezy ćělesomaj nawjazał bě serbski komponist Jan Cyž.


Wochozy: Mejski swjedźeń w parku błudźenkow

Serbska rejowanska skupina Smjerdźaca je njedźelu w Parku błudźenkow we Wochozach nałožk mejemjetanja předstajiła. Na serbske kulturne popołdnjo bě tamniše spěchowanske towarstwo přeprosyło. Za to su tam meju stajili, kiž rejowarjo po tradiciji mjetachu a so wo wjeršk wubědźowachu. Něhdźe 150 přihladowarjam předstajichu po tym serbske reje.


Oberammergau: Młodostni sej pasion wobhladali

90 serbskich młodostnych je sej kónc tydźenja do bayerskeho Oberammergauwa dojěło. Su sej tam šěsćhodźinske předstajenje generalneje proby pasionskeje hry wobhladali. Po dołhej tradiciji tutu tam kóžde dźesać lět předstajeja. 2020 buchu předstajenja přestorčene a su nětko lětsa wot srjedź meje hač do oktobra.