Powěsće: štwórtk, 12.05.2022


Wien: UEFA a Europeada dźěłatej hromadźe

Lětušu Europeadu w Korutanskej chce tež Europski koparski zwjazk UEFA podpěrać. Kaž praji jeho prezident, Aleksander Čeferin, wutoru při zetkanju we Wienje, matej Europeada a UEFA mnoho samsnych hódnotow a zajimow, tohodla je zhromadne dźěło předwidźane. Prezident Federalistiskeje unije narodnych mjeńšin, Loránt Vincze, je předsydu zwjazka UEFA přeprosył, jako patron koparski turněr w Korutanskej wotewrić. Europeada wotměje so lětsa wot 25. junija do třěćeho julija.


Radwor: Z gmejnskeje rady

W Radworju je gmejnska rada sjredu rozsudźiła, zo twarska firma z Jězora (němsce: See) pola Niskeje dotalne parkowanišćo blisko kěrchowa wutwari. Wjele lět běše to skerje pusty blak, nimo toho njeběchu lěta dołho wobsydstwowe poměry cyle wujasnjene. Firma chce w juniju započeć twarić a w zažnej nazymje parkowanišćo přepodać. Cyły projekt płaći nimale 90.000 eurow.


Wostrowc: Zahubne plany klóštra

Klóšter Marijiny doł we Wostrowcu chce drohotne rukopisy z 13. lětstotka předać. K tomu bě šwicarski wikowar nadawk dóstał, zajimowanych kupcow sposrědkować. Hódnotu trochuja fachowcy na wjacore miliony eurow. Sakscy eksperća na polu wuměłstwa a stawiznarjo kritizuja předawanske plany a pomjenuja je jako katastrofu za kulturne herbstwo swobodneho stata.


Budyšin: Dóstanu měšćanskeho managera

Město Budyšin dóstanje měšćanskeho managera. Kaž měšćanski zarjad informuje, je nětko spěchowanska zdźělenka dóšła. Přez měšćanski managment ma so Budyšin bóle jako wikowanske městno prezentować. Tež dalewuwiće Stareho města je předwidźane. Spěchowanje wučinja 400.000 eurow za štyri lěta. Město Budyšin změje swójski podźěl 10 procentow njesć. Pjenjezy přińdu z hornca za strukturnu změnu.


Wojerecy: Planuja Krabatowy běh

Wojerowski sportowy klub přihotuje tuchwilu "Krabatowy běh firmow". Planowana je dwaj kilometraj dołha čara wokoło Krabatoweho młyna. Kóždy běhar a běharka móže dwaj abo štyri kilometry za swoje mustwo běžeć. Cyłkownje dyrbi kóždy team dokładnje 20 kilometrow absolwować. Přizjewić móža so firmy přez internetowu stronu SC Wojerecy. Tam je tež wjace informacijow wo wotběhu firmoweho běha, kiž přewjeźe so 15. junija.