Powěsće: sobotu, 14.05.2022


Towarstwa: TCM ma noweho předsydu

Nowy předsyda Towarsta Cyrila a Metoda je 44-lětny Cyril Hančik z Radworja. Na hłownej a wólbnej zhromadźiznje pjetk bu wón wot noweho předsydstwa woleny. Wón přewza zastojnstwo wot Jurja Špitanka, kiž bě 12 lět předsyda TCM. Špitank je nowemu předsydstwu jako poradźowacy čłon po boku.


Hornja Łužica: Statistika wobchadnych njezbožow 2021

W policajskej direkciji Zhorjelc je so loni mjenje ludźi při wobchadnych njezbožach zraniło hač 2020. To wuńdźe z wuhódnoćenja wobchadnych datow direkcije. Policajski prezident, Manfred Weißbach, pokaza pak na to, zo je přez pandemiju a z tym zwisowacym domjacym dźěłom mjenje wobchada było. Njehladajo na to dóńdźe k 27 smjertnym njezbožam, přewažnje přewysokeje spěšnosće dla.


Wojerecy: Ćiskowska wodarnja so wutwari

Ćiskowska wodarnja Zastaranskich zawodow Wojerecy so hač do kónca lěta wobšěrnje rozšěrja. Jeho wukonowa kapacita potom wot tuchwilu 8.600 kubiknych metrow wody wob dźeń na 11.500 kubiknych metrow stupa. Z tym hodźi so přichodnje wjac hač do 40.000 domjacnosćow w měsće a we wokolinje kaž tež přidatne přemysłowe a industrijowe předewzaća stabilnje zastarać. To praji wyši měšćanosta Torsten Ruban-Zeh pjatk při symboliskim prěnim zarywje. Cyłkownje 2,5 milionow eurow projekt płaći, z ćehož so 90 procentow z pjenjez za strukturnu změnu spěchuje.


Chrósćicy: Jakšt dale nawoda

Na hłownej zhromadźiznje Chróščanskeje gmejnskeje wohnjoweje wobory pjatk bu Měrćin Jakšt znowa jako gmejnski nawoda wohnjoweje wobory wuzwoleny. Jako jeho zastupjerja wopodstatnichu wobornicy Hórčana Clemenca Suchyja. Za přichodne pjeć lět staj zamołwitaj za wobornistwo w Chróščanskej gmejnje. Nimo toho posćesćichu dweju kameradow za 50-lětnu a pjeć kameradow za 40-lětnu słužbu we wohnjowej woborje.


Budyšin: Jan Chlebniček zemrěł

W starobje 86 lět je srjedu w Budyšinje zemrěł čěski dirigent a komponist Jan Chlebniček. 22 lět skutkowaše jako orchestrowy nawoda w Serbskim ludowym ansamblu a wobohaći z instrumentalnymi twórbami a wobdźěłanjemi serbsku hudźbnu kulturu. Za to spožći so jemu tež Wuměłske myto Domowiny. Jeho hudźbne tworjenje wobsahowaše tež twórby za klankodźiwadło a činohrajne kruchi. Hač do wysokeje staroby podpěrowaše Chlebniček ludowuměłske skupiny, wjesne chóry, regionalne ansamble a samo cyrkwinske wosady z přewodom na klawěrje, keybordźe a pišćelach.