Powěsće: póndźelu, 16.05.2022


Hornja Łužica: Mejemjetanja

Na wjacorych městnach Hornjeje Łužicy je kónc tydźenja meja padnyła. W Pančicach-Kukowje bě sobotu dohromady 37 dźěćacych a młodźinskich porow, kiž meju mjetaše. W Nuknicy bě jich njedźelu 16 porow dźěći a młodostnych. W Njebjelčicach je 12 porow wokoło meje rejowało. W Lichanju je njedźelu po 90 lětach prěni raz zaso meja padnyła, tam mějachu štyri dźěćace pory. Něhdźe 70 ludźi je sej podawk wobhladało a po tym zhromadnje bjesadowało.


Wulka Dubrawa: Nowy wjesnjanosta woleny

Wulka Dubrawa ma noweho wjesnjanostu. Při wólbach njedźelu móžeše so jednotliwy kandidat Hardy Glausch (bjezstronski) chětro jasnje z nimale 72 procentami přesadźić přećiwo dotalnemu wjesnjanosće, Lutzej Mörbe (tohorunja bjezstronski). Glausch je 47 lět stary a nawjeduje dotal Wulkodubrawsku filialu wokrjesneje nalutowarnje Budyšin. Wólbne wobdźělenje ležeše pola 63 procentow. Wolić móžachu wobydlerjo tych něhdźe 20 wjesnych dźělow gmejny Wulka Dubrawa.


Rowno: Wuwićowy koncept předstajeny

Za wuwićowy koncept Rowneho je tójšto idejow. Na informaciskim zarjadowanju pjatk bu mjez druhim nowotwar WITAJ-pěstowarnje "Milenka" w nošerstwje Slepjanskeje gmejny mjenowany. To zwyši atraktiwitu městna a kubłanišćo słuša do centruma wsy, praji zamołwity planowar. Hdyž maja wobydlerki a wobydlerjo Rowneho dalše ideje za wuwićowy koncept, potom móža so dale pola zamołwitych z nimi přizjewić.


Europeada: Skupiny so znowa wulosuja

Skupiny za lětušu Europeadu w Korutanskej dyrbja so znowa wulosować. Wone běchu poprawom hižo jasne, změnow pola přizjewjenjow dla pak so wulosowanje wospjetuje. Kaž wuhotowar FUEN zdźěli, přewjedźe so wone na dźensnišej póndźeli online. Tuž změje tež serbske mustwo hinašich přećiwnikow, hač bě dotal postajene. Cyłkownje so 20 muskich mustwow a štyri žónske na lětušej Europeadźe wobdźěla.


Wotrow/ Njebjelčicy: Prěnje swj woprawjenje Wotrow/Njebjelčicy

W Njebjelčicach a we Wotrowje su njedźelu prěnje swjate woprawjenje swjećili. W Njebjelčanskej swjatnicy přistupi sydom dźěći prěni raz k blidu božemu. Wšitke tři holcy běhu w družčej drasće. Tež we Wotrowje běchu wšě holcy jako družki. Jich bě štyri, dohromady dźěše tam wosom dźěći k prěnjemu swjatemu woprawjenju.


Wodowe Hendrichecy: Treningowe lěhwo Wudworskich

Serbski folklorny ansambl Wudwor je był přez kónc tydźenja w treningowym lěhwje we Wodowych Hendrichecach. Tam su nazwučowali pod nawodom Kornela Kolembusa, Yulyje Kasyanoweje, Georgija Marinova, Jana Kozelnickeho a tež Volkmara Šołty a Měrćina Handriki najwšelakoriše reje. Něhdźe 100 dźěći, młodostnych a staršich je w štyrjoch skupinach trenowało za lětuši 40lětny jubilej Wudworskeho ansambla, kiž woswjeći cyłk srjedź julija.