Powěsće: srjedu, 18.05.2022


Ralbicy/Róžant: Klóštersku wodu renaturěrować

Gmejna Ralbicy-Róžant da wuwiwać koncept, kak hodźa so swójske wodźizny lěpje wobhospodarić a so přirodźe bóle přiměrić. Jako prěnje je někak kilometer dołhi wotrězk w Šunowje předwidźany. Wobsedźerjow wokolnych ležownosćow je gmejna hižo informowała, dokładniše informacije hišće sćěhuja, tak wjesnjanosta Hubertus Ryćer. W nazymje chcedźa potom z dźěłami na městnje započeć. To ma być započatk za dalši přetwar rěčnišćow druheho rjadu gmejny. Dohromady ma gmejna Ralbicy-Róžant na 35 kilometrow rěčnišćow wobhospodarić.


Njebjelčicy: Tomaš Čornak njeje wopak jednał

Njebjelčanski wjesnjanosta Tomaš Čornak njeje w swojim zastojnstwje přećiwo zakonjej jednał. To je wuslědk pruwowanja Budyskeho krajnoradneho zarjada, kiž tole na naprašowanje zdźěli. Z tym su wumjetowanja internetoweje strony "wahrheit-krabat.com" ze zarjadniskeho wida najprjedy z blida. Wšelake skóržby tuteje onlinoweje strony dla pak dale wobsteja.


Běła Woda: Kak dale z pitnej wodu

Město Běła Woda by měło wulke njelěpšiny, jeli so sparće pitneje wody a wopłočkow z měšćanskich zawodow wuwzatej a zaměrowemu zwjazkej Srjedźna Nysa - Šepc přizamknjetej. To wuchadźa z analyzy, kotruž je město pola njewotwisnych pruwowarjow do nadawka dało. Tući trochuja, zo njeby město jako wunošk potom w přichodnych pjeć lětach wjace šěsć, ale jenož hišće dwaj milionaj eurow wupłaćene dóstało. Dla personalneho planowanja zaměroweho zwjazka dyrbjeli tež 15 sobudźěłaćerjow pušćić. Měšćanske zawody Běłeje Wody město z płunom, energiju, dalnoćopłotu a wodu zastaruja a přisłušeja mjeztym 20 lět firmje Veolia.


Budestecy: Nowy zarjadnisku centrum so poswjeći

W Budestecach so srjedu přetwarjene dwórnišćo poswjeći a zaso přepoda. Kulturnohistorisce wuznamne twarjenje z lěta 1877 bu w zašłych třoch lětach po pomnikoškitnych zasadach přetwarjene a je nětko nimo toho bjezbarjernje přistupne. Do njeho zaćehnje komunalny centrum za zarjadniske zjednoćenstwo Budestecy - Hornja Hórka. Cyłkowne kóšty za přetwar wučinichu 4,3 miliony eurow. Wjace hač połojcu je swobodny stat Sakska z programa "Witalne wjesne jadra a wjesne centrumy na kraju" spěchował.


Chrósćicy: Pytaja logo za jubilej

W Chrósćicach je so wutoru k štwórtemu razej wuběrk za přihot 800-lětneho jubileja prěnjeho naspomnjenja wjeski Chrósćicy schadźował. Gmejnski a wosadny swjedźenski tydźeń wotměje so wot 13. - 22. junija 2025. Hižo nětko pyta so logo za jubilej. Ideje a namjety móža so hač do kónca septembra na gmejnje w Chrósćicach abo na tamnišej farje zapodać.