Powěsće: wutoru, 29.11.2022


Wojerecy: Direktny zwisk do Lipska doskónčnje dale njeposkića

Direktny zwisk mjez Lipskom a Wojerecami so dale njeposkića. Zaměrowy zwjazk bliskowobchadowy rum Lipsk (ZVNL) swoju dotalnu liniju zastaji. Wo tym je Wojerowski wyši měšćanosta, Torsten Ruban-Zeh, póndźelu informował a rozsud wótrje kritizował. Wot 11. decembra pojědźe z Wojerec jenož hišće regionalny ćah na směr Lipsk, sobujěducy měli pak w Falkenbergu přelězć. Přičina je, zo njemóžeštej so zaměrowy wobchadny zwjazk z Lipska (ZVNL) a łužiski ZVON na zhromadne rjadowanje čary Lipsk - Wojerecy dojednać.


Drježdźany: SŠT zwólniwe, nošerstwo serbskeje dnjoweje skupiny přewzać

Serbske šulske towarstwo je zwólniwe, wot noweho lěta nošerstwo serbskeje dnjoweje maćerje w Drježdźanach přewzać. To rozsudźi předsydstwo SŠT na swojim póndźelnišim posedźenju we Wojerecach. Drježdźanske towarstwo Stup dale z.t. je so z wotpowědnej próstwu na Serbske šulske towarstwo wobroćiło, dokelž je dotalny nošer zrěčenje ke kóncej lěta wupowědźił.


Łužica: Nowe dwurěčne pjekarske tity

Budyski wokrjesny zwjazk rjemjeslnikow přihotuje za klětu štyri dwurěčne pjekarske tity. Kaž jednaćelka Sabine Gotscha-Schockowa praji, přihotuja tuchwilu tity za ćišć z motiwami, receptami a dwurěčnym popisanjom na temy “Chlěb a sól”, “Kermuša”, ”Kmótřiska całta” a “Ptači kwas”. Serbske a němske pismo na titkach budźe jenak wulke. Tute so potom w januarje na čłonske pjekarnje rozdźěla. Nastork za nowu akciju da podobny projekt  pjekarskich titow “Ptači kwas” Załožby za serbski lud. Za nowy projekt je wokrjesne rjemjeslnistwo při wubědźowanju Simul+ 10.000 eurow dobyło.


Radwor/Bronjo: Žiwy adwentny kalender wosady

W Radworskej wosadźe maja tež lětsa zaso žiwy adwentny kalender z wosom stacijemi. Na prěnim zetkanju zašły kónc tydźenja w Bronju bě so 80 ludźi wobdźěliło, tak organizatorka kalendra, Marija Bušina. Dalše stacije su mjez druhim w Radworju, Kamjenjej, Małym Wjelkowje, Boranecach, Radworskim Haju a Zdźěri. Jednotliwe stacije wuhotuja swójby prěnjowoprawjenskich dźěći. Radworscy wosadni zetkawaja so kóždu adwentnu sobotu a srjedu k žiwemu adwentnemu kalendrej a zaběraja so při tym z adwentnymi temami.


Budyšin: Šulerska firma dźěła ze šulerjemi we Worklecach

We Łužicy dźěła wotnětka šulerski zawod ze šulerjomaj we Worklečanskej wyšej šuli. Je to projekt Budyskeho towarstwa Tagwerk. Šulerki a šulerjo při tym samostatne dźěło z mašinami za grawury, kaž z CNC-laserom nawuknu, tak předsyda towarstwa André Měrćink. Dotal su hromadźe ze Serbskim muzejom motiwy Měrćina Nowaka-Njechorńskeho z laserowej grawuru na kamjentne tafle přenjesli. Tute su nětko na předań Mjeno zawoda "Lstrok" wotwodźuje so wot kompjuteroweho pomjenowanja za pismik Ł.


Digitalny swět: Adwentny podcast z Měrkom Brankačkom

Sakska imagowa kampanja "Sorbisch? Na klar!" je nowy adwentny podcast wozjewiła. W prěnim dźělu rěči dźiwadźelnik Měrko Brankačk wo swojich wosobinskich hodownych tradicijach, wo adwentnych dopomnjenkach ze swojeho dźěćatstwa a čita swoju najlubšu hodownu stawiznu. Na přichodnych adwentnych njedźelach dalše epizody podcasta slěduja. Tutón je w němskej rěči, wšako so imagowa kampanja na němskorěčnych wobydlerjow Sakskeje měri.


Rakecy: Zběraja za adwentny wobłuk

Rakečanska gmejna zběra pjenježne dary za adwentny wobłuk. Wo tym informuje wjesnjanosta Sven Nowotny w gmejnskej nowinje. Adwentny wobłuk ma so před cyrkwju postajić a tam přez cyłe lěto stać, nic jenož w zymje. Dźěl adwentneho wobłuka móža ze spěchowanjom z LEADERoweho programa zapłaćić, swójski podźěl chce gmejna přez hodowne dary nazběrać.