Powěsće: srjedu, 30.11.2022


Podstupim: Serbska rada Braniborskeje so schadźowała

Serbska rada Braniborskeje je so na swojim posedźenju wutoru na wuzwolenje delnjoserbskich čłonow Rady Załožby za serbski lud přihotowała. Pjeć kandidatow so předstaji. Staj to nětčišej čłonaj Diana Šejcowa a Markus Końcar a jako nowi kandiduja Angela Šurmannowa, Torsten Mak a Julian Brüning. Na kubłanskim polu je Serbska rada zhoniła, zo šulski zarjad Choćebuz znowa organizuje intensiwne rěčne dalekubłanje za wučerjow a kubłarki. Start je w februarje, budu dlěje hač lěto přeco wotydźenja jedyn dźeń w dźěłowym času serbsce wuknyć. Nětko pytaja wobdźělnikow za tutón kurs.


Wojerecy: Přeja sej decentralne zaměstnjenje ćěkancow

Město Wojerecy wuznawa so k přijimanju dalšich azyl pytacych, faworizuje pak decentralne zaměstnjenje. To podšmórny wyši měšćanosta Wojerec, Torsten Ruban-Zeh, wutoru na posedźenju rady města. Na naprašowanje informowaše wo tym, kelko ćěkancow je tuchwilu we Wojerecach žiwe: w dwěmaj centralnymaj přebywanišćomaj dohromady 500, dalšich 100 w bydlenjach. Kelko Ukrainjanow tu je, njemóžeše dokładnje rjec. 12. decembra změje wokrjesny sejmik Budyšin rozsudźić, hač so w Kinajchće w něhdyšim ličenskim centrumje dalši dom za azyl pytach zarjaduje, přećiwo čemuž wobydlerjo protestuja.


Pančicy-Kukow: Rozsudźili kak dale dla włóžnoty

Z rozšěrjenjom klimatiskeje připrawy ma so w pincy twara zarjadniskeho zwjaka "Při Klóšterskej wodźe" włóžnoće zadźěwać. To rozsudźichu radźićeljo wutoru w Pančicach-Kukowje na zhromadźiznje zwjazka. Naprawa ma 8.000 eurow płaćić. W jednym rumje w pincy klimatiska připrawa z dobrym wukonom hižo dźěła. Tohodla maja so tež tamne rumnosće klimatizować. Rozsud bě trěbny, dokelž włóžnota w pincy składowane akty kóncuje.


Hornja Łužica: Wjace płaćić za bus a ćah

Wot klětušeho awgusta so jězby z busom a železnicu w Hornjej Łužicy stupacych zawodnych kóštow dla podróša. Wobchadny zwjazk ZVON je wutoru zwyšenje płaćiznow za swoju tarifowu kónčinu wobzamknył. Tute pak je moderatne, praji jednaćel Hans-Jürgen Pfeiffer. W přerězku stupaja tarify 6 do 8 procentow.Tak płaći na přikład jednotliwa jězba po čarje Budyšin - Zhorjelc wot awgusta 60 centow wjace, potajkim 10,60 eurow město 10 eurow.


Malešecy: Pěstowarske wustawki změnili

We wustawkach gmejny Malešecy wo hladanju dźěći w gmejnskich dźěćacych přebywanišćach so konkretne pjenježne sumy, kiž maja starši zapłaćić, šmórnu. To je gmejnska rada wutoru wobzamknyła. Zo we wustawkach z lěta 2016 sumy steja, je zmylk, dokelž so popłatki procentualnje wuliča a móža so změnić. Tak so z nowym lětom měsačny popłatk za žłobik w Malešecach za prěnje dźěćo wo 30 do 40 eurow zwyši a za pěstowarnju mjez pjeć a wosom eurami.


Chrósćicy: Tadej Cyž nowy předsyda SJ Chrósćicy

52 lětny Tadej Cyž z Chrósćic je nowy předsyda Sportoweje jednotki Chrósćicy. Na njedawnej hłownej a wólbnej zhromadźiznje wuzwolichu čłonojo SJC Cyža za naslědnika Jurija Kokle. 67 lětny Kokla po 7 a poł lětach hižo kandidował njebě. Nowy jednaćel je Rico Pohling, pokładnik Simon Žur, prěni městopředsyda Krystof Mikławšk a druhi městopředsyda Tomaš Domaška.