Powěsće: póndźelu, 05.12.2022


Rakecy: Delnjoserbska kantata wuspěšna

Delnjoserbska hodowna kantata zaklinča njedźelu w Rakečanskej cyrkwi a z tym prěni króć w Hornjej Łužicy. Twórbu, kotruž napisaštaj Oksana Weingardt a Bernd Pittkunings, zanjesechu chór a dujerjo Serbskeho ludoweho ansambla, chór "Łužyca", spěwnej solistaj a Oksana Weingardt sama při harmonijumje. Delnjoserbska hodowna kantata zaklinči na 3. adwentnej njedźeli w Slepom.


Drježdźany: "Spěwny duel" na adwentnych wikach

Sobotu nawječor dóńdźe na hodownych wikach při Körnerowym naměsće w Drježdźanach k wosebitemu „spěwarskemu duelej“ okcitaniskeje muskeje spěwneje skupiny Lo Cocut z łužiskimi Přezpólnymi. Něhdźe połdra hodźiny spěwachu mužojo wotměnjejo spěwy swojeje domizny. Na dnju dwustotych posmjertnych narodnin Korle Awgusta Kocora zaklinča w Sakskej stolicy tež serbska hymna. Spěwne měrjenje mocow skónči so njerozsudne a bě za wobě stronje wuspěšne: Hromadźe swjećachu spěwarjo z dalšimi znatymi na burskim statoku na kromje Drježdźan okcitansko-serbski swjedźeń z łužiskimi a južnofrancoskimi kulinariskimi chłóšćenkami a dalšimi pěsnjemi.


Mnichow: Serbja na dialogu etniskich mjeńšinow

We wobłuku Sudetoněmskich dialogow su so tež třo Serbja jako referenća na konferency w Mnichowje wobdźělili. Christina Boguszowa wěnowaše so w swojim přednošku přichodej Serbskeho muzeja Budyšin a kak chce młódše generacije zaso do muzeja wabić. Mjez něhdźe 30 wobdźělnikami konferency běchu zastupjerjo Ladinskeje mjeńšiny, Němcy z Čěskeje, Serbja a Sudetscy Němcy.


Budyšin: "Zernička" na adwentničce premjeru měła

Nowy serbsko-ewangelski dźěćacy a młodźinski spěwnik “Zernička” je so njedźelu na połnje wobsadźenej Michałskej farje w Budyšinje předstajił. Sobuiniciatorka fararka Jadwiga Malinkowa dźakowaše so na adwentničce wšitkim sobuskutkowacym a ma spěwnik za wulke wobohaćenje za młodźinske dźěło. Serbske ewangelske towarstwo a Serbski wosadny zwjazk staj spěwnik wudałoj. Po tym, zo bě předchadnik z lěta 1998 wupředaty, je so zašłe tři lěta intensiwnje na nowonakładźe z wjac hač 100 načasnymi kěrlušemi dźěłało.


Róžant: Dźeń wotewrjeneje sedłarnje

Wjacore sta wjesnjanow, konjacych sportowcow, křižerjow a dalšich hosći je njedźelu w Róžeńće na nowowotewrjenju Bukec sedłarnje-manufaktury pobyło. Rodźeny Wotrowčan Marek Buk je lětsa ze swójbnymi w putniskej wsy na něhdyšim Domšec statoku tykowany dom přetwarił a wutwarił. Sedłarski mišter poskićuje tam wot hnydom nimo klasiskich sedłarskich dźěłow tež druhe sedłarske posłužby.


Lipsk: Serbski Dołhowłosač Sakski mišter

Achim Weclich z Pěskec słuša dale k najlěpšim plahowarjam rasowych nuklow cyłeje Sakskeje. Na krajnej wustajeńcy kónc tydźenja w Lipsku wobsadźi wón ze swojej družinu „Dołhowłosače“ znowa prěnje městno. Z tym bu po lětach 2014, 2016 a 2018 hižo štwórty raz Sakski mišter. Achim Weclich je čłon Njebjelčanskeho towarstwa plahowarjow nuklow. Wšo hromadźe bě w Lipsku něšto wjac hač 4.000 rasowych nuklow wustajene.