Powěsće: wutoru, 06.12.2022


Wojerecy/Budyšin: Nutřkowny minister Schuster pola Serbow był

Sakski nutřkowny minister Armin Schuster (CDU) je póndźelu prěni raz Serbow wopytał. Wobhladał je sej dźěło komunalneho přełožowanskeho běrowa we Wojerecach. Po tym informowaše so wo stawje přepytowanjow nastupajo wonječesćenja swjatych křižow w Kulowskej kónčinje. Přeprosył bě ministra Schustra předsyda Domowiny Dawid Statnik, kiž wuzběhny jeho wotewrjenosć a hódnoći wopyt ministra tež jako připóznaće napřećo Serbam a jich wojowanju wo swoje prawa a zdźerženje swojeje rěče a kultury.


Smělnja-Póckowy/Łomsk: Mrětwa pjerizny wudyriła

W Budyskim wokrjesu je na dwěmaj městnomaj mrětwa pjerizny wudyriła. Kaž wokrjes póndźelu informowaše, wobsteji nětko wokoło Smělneje-Póckowow dźesać kilometrow wulke zawrjene pasmo. Wobkedźbuja so mjez druhim tež Kanecy, Žuricy a Hodźij. Byrnjež je mrětwa pjerizny tež we Łomsku pola Radworja wudyriła, tam žane tajke pasmo njewobsteji, dokelž so tam wirus njeje tak rozmnožić móhł. W Budyskim wokrjesu su pak wot nětka wšitke wustajeńcy za pjeriznu zakazane.


Budyšin: Akterki a akterojo pytani

Serbja, Němcy – komu słuša "naš kraj"? Tak rěka projekt, kiž ma Hornjo- a Delnjoserbow kaž tež Němcow z Łužicy na jewišću hromadźe zwjesć. W srjedźišću steja kompleksne byće a ideje za zhromadny přichod Serbow a Němcow we Łužicy. Ideju za inscenaciju předstaji projektowy team póndźelu wječor w Budyskim dźiwadle, castingowe dźěłarnički přewjedu so kónc tydźenja. Swoju premjeru změje inscenacija klětu w Statnym dźiwadle w Choćebuzu, w Budyšinje a na wšelakich stacijach festiwala "Zwjazka šesćiměstow". Projekt spěchuje so podźělnje přez Załožbu za serbski lud.


Wokrjes Budyšin: Zjawny list krajnemu radźe

Wjacore towarstwa wokrjesneho Zwjazka za demokratiju a mnohotnosć su so ze zjawnym listom na Budyskeho krajneho radu Uda Witschasa wobroćili. W tutym žadaja sej decentralne zaměstnjenje wo azyl požadacych njehladajo na kraj, z kotrehož pochadźeja. Runje tak žadaja sej, zo móža - podobnje ukrainskim ćěkancam - rěčne kursy wopytać a swoje dźěći do šule abo dnjoweho kubłanišća słać. Spěšne, njeběrokratiske kročele měli potrjechenym zmóžnić, dźěło namakać. Zjawny list podpisało je tež towarstwo "Budyšin wostanje pisany".


Hamor: Lěpše wuměnjenja za ludźi z handicapom

Gmejna Hamor chce Bjerwałdski jězor w přichodźe přijomnišo za ludźi z handicapom wutwarjeć. Na swojim póndźelnišim posedźenju schwalichu za to twarske naprawy we wysokosći 27.000 eurow. Tak maja při Hamorskim, Klětnjanskim a Delnjowujězdźanskim přibrjohu platformy bjez barjerow nastać kaž tež móžnosće k sedźenju. Twarske projekty spěchuja so přewažnje z programa "Sakska bjez barjery 2030", zbytk zapłaći gmejna Hamor.


Hrubjelčicy: "Hody jědu!"

Něhdźe 120 ludźi wopyta póndźelniše předstajenje Němsko-Serbskeho ludoweho dźiwadła a Serbskeho ludoweho ansambla “Hody jědu” w Hrubjelčicach. Pod hołym njebjom dožiwichu dwurěčnu sćinohru “Šlink Beno po puću do Betlehema”. Ze zhromadnym spěwom program zakónčichu. Na dźensnišej wutorje dojědźe sej pućowace jewišćo do Noweje Wjeski.