Serbja a Twitter
Hauptinhalt
Hač Domowina, wědomostnikaj Friedrich Pollack a Robert Lorenc, hač politikar Hajko Kozel, žurnalist Danko Handrik abo politiska aktiwistka Annalena Schmidtec. Woni wšitcy maja něšto zhromadneho. Wšitcy tući a hišće wjele druhich su mjenujcy na digitalnej platformje Twitter aktiwni. Naši kolegojo onlinoweje redakcije su sej to raz bliše wobhladali.
Woni mjenuja so mjez druhim Schmanle, boblinger77, piwarc, Pofri abo Schnipl a su na Twitter móhłrjec za to zamołwići, zo so tam tež serbske temy a naležnosće jewja a diskutuja. Twitter, kiž je so w lěće 2006 zrodźił, liči k digitalnym komunikaciskim platformam a rozeznawa so tak wot znatych skerje socialnych platformow. Hinak hač na Facebooku, hdźež steji skerje to wosobinske skontaktowanje w srjedźišću, abo tež na Instagramje, hdźež so mjezsobu hłownje wobrazy sćela, wužije so Twitter wot spočatka sem za publikowanje krótkich tekstowych powěsćow – tak mjenowanych Tweets. Mjeztym pak so přez Twitter tež wobrazy a wideja dale sćelu a publikuja.
Serbscy wužiwarjo ze wšelakorych přičin na Twitteru aktiwni
Serbski rěčny aktiwist Julian Nyča je hižo dźesate lěto na Twitteru aktiwny a liči tak k najpilnišim serbskim wužiwarjam platformy. Zo so na Twitteru tež serbsce piše, je za Juliana Nyču wězo samozrozumliwe.
Wosebje k temam žiweje dwurěčnosće w serbskich regionach so jeho krótko-přinoški wěnuja
Danko Handrik, žurnalist a korespondent sćelaka ARD w Čěskej a Słowakskej, liči runjetak k wužiwarjam Twittera. Jeho motiwacija tam aktiwny być wuchadźa tež z jeho funkcije jako korespondent.
Tak rozprawja wón wo wobstejnosćach w Praze runje tak kaž wo nowostkach we Łužicy.
Tež serbske institucije na Twitteru aktiwni
Tola njejsu to jenož priwatnicy, kiž so wo to postaraja, zo je serbska rěč a zo su serbske temy na Twitteru prezentne. Tež ze serbskich institucijow, organizacijow abo towarstwow su někotři tam aktiwni. Mjez druhim tež redakcija Rozhlada abo Budyske studijo Sakskeho wukubłanskeho a wupruwowanskeho kanala (SAEK) . Domowina a Serbski institut wužiwatej platformu, zo byštej zajimcow tež skerje wo specifiskich a fachowych temach informowali, kotrež druhdźe – kaž na Facebooku abo Instagramje – skerje njezajimuja.
Tule widźiće stronu Domowiny, třěšneho zwjazka Serbow na Twitteru.
A tež Serbski institut wita swojich hosći a zajimcow na stronje hnydom we wjacorych rěčach.
Serbske přisłowa na Twitteru
Dalši zajimawy account zaběra so ze serbskimi přisłowami. Město dołhich artiklow so tam prawidłownje krótke přisłowa w serbskej a němskej rěči publikuja.
